በኢትዮጵያ በህጋዊ መንገድ የተመዘገብን፣ የካራቴ-ዶ (Karate-do) ጥበብን በአግባቡ ለማሳደግ፣ ለማዳበር እና ለማስተማር ቆርጠን የተነሳን ለትርፍ ያልቆመ ተቋም ነን። የካራቴ ጥበብ መሰረቱ እያንዳንዱ ካራቴካ (Karateka) በስነ-ምግባር ታንጾ፣ የተሟላ መልካም ስብዕናን እንዲገነባ ማድረግ ላይ ያተኮረ የቡዶ (Budo) ፍልስፍና ነው።

የእኛ ተልዕኮ የካራቴ ፍላጎት ያላቸው ግለሰቦች በሙሉ፣ የዚህን ስፖርት ጥልቀት፣ ውበት እና ስፋት እንዲገነዘቡ ማበረታታት ነው። እውነተኛ ካራቴ ማለት በዕለት ተዕለት ሕይወት ውስጥ በትሕትና፣ በአእምሮ እና በአካል ብቃት እራስን ማሰልጠን ነው። ካራቴ ፈታኝ እና ወሳኝ በሆኑ የህይወት አጋጣሚዎች ሁሉ ለፍትህ እና ለእውነት ጽኑ ታማኝ መሆንን ይጠይቃል።

የካራቴ የመጨረሻ ግብ ማሸነፍ ወይም መሸነፍ ሳይሆን፣ በተከታታይ ስልጠና የተሳታፊዎችን ስብዕና እና ባህሪ ማስተካከል፣ ማበልፀግ እና ወደ ፍጽምና ማድረስ ነው።